2026ko jai egunak (lan egutegia)

Artikulu honetan, datorren urteko jaiak eta egutegia emateaz gain, plus bat ere ekarri dizuegu:

– ENPRESAN LAN EGUTEGIAri begira argi izan behar diren puntutxo batzuk ere aurkituko dituzue, hala nola zer islatu behar den derrigor (jardunaldiaren banaketa irregularra barne), non kokatu behar den, langileen ordezkaritzarekin kontsultatu beharra…

– KARTELERA ere topatuko duzue, hilabete bakoitzeko orduak eta jardunaldia zein txandak ondo apuntaturik izan ditzazuen. JPG irudi moduan eta PDFz daukazue, jaitsi ahal izateko eta, nahi izanez gero, inprimatzeko.

2026ko jai egunak (lan egutegia)

2026ko jai egunak (lan egutegia)

2026/01/05

2026ko jai egunak (Estatua)
2026ko jai egunak (EAE)
2026ko jai egunak (Nafarroa)

Artikulu honetan, datorren urteko jaiak eta egutegia emateaz gain, enpresa barruan lan egutegiaz jakin beharreko zenbait puntu garrantzitsu ere azalduko dizkizuegu.

2026ko jai egunak

Urtero argitaratzen dira BOEn hurrengo urteko jai egunak. Madrilen ezartzen diren jai horietatik, zenbait erkidego guztietan errespetatu beharrekoak dira; hala ere, egun batzuk erkidegoek alda edo truka ditzakete eta beste jai batzuekin ordezkatu.

Urriaren 18an argitaratu dira zeintzuk jai egun izango diren Estatuan 2026rako. Orotara, 14 jai egun izango dira eta honelaxe daude bereizturik:

8 jai egun, Estatu osoan derrigor bete behar direnak

— Urtarrilak 1 (osteguna): Urte Berri eguna
— Urtarrilak 6 (asteartea): Errege Eguna
— Apirilak 3 (ostirala): Ostiral Santua
— Maiatzak 1 (ostirala): Maiatzaren Lehena
— Abuztuak 15 (larunbata): Ama Birjinaren Jasokundea
— Urriak 12 (astelehena): Espainiako jaia
— Abenduak 8 (asteartea): Sortzez Garbiaren eguna
— Abenduak 25 (ostirala): Eguberri eguna

Erkidego autonomoek jai propioak ere hautatu ahal dituzte (Estatuak aukeran ematen dituen zenbaiten artean). Hauexek dira 2026rako Nafarroako zein Euskadiko Autonomia Erkidegoetan hautatutako 4 egunak:

Nafarroan eta EAEn:
— Martxoak 19 (osteguna): San Jose
— Apirilak 2 (osteguna): Ostegun Santua
— Apirilak 6 (astelehena): Pazko Astelehena

Nafarroan:
— Arazoak 2 (astelehena): Domu Santua igandean izango denez, astelehenera mugitu da

EAEn:
— Uztailak 25 (larunbata): Done Jakue

Tokian tokiko jaiak (egun bi)

Urtean zehar, tokian tokiko jai bi hartu izaten dira. Hauek herrialdeko jai eguna eta herriko jai eguna izaten dira.

HERRIALDEKO JAIAK:

— Araba: Apirilak 28 (asteartea): San Prudentzio
— Bizkaia: Uztailak 31 (ostirala): Loiolako San Inazio
— Gipuzkoa: Uztailak 31 (ostirala): Loiolako San Inazio
— Nafarroa: Abenduak 3 (osteguna): San Frantzisko Xabier. Gogoratu abenduaren 3a Euskararen Eguna ere badela

UDAL JAIAK:

Azkenik eta esan bezala, herri bakoitzak bere jai eguna ospatuko du. Hegoaldeko herri guztietako jaiak ondoko loturetan kontsulta ditzakezue:

Arabako herriak
Bizkaiko herriak
Gipuzkoako herriak
Nafarroako herriak

Hortaz, hauexek izango dira Hego Euskal Herriko jaiak:

- - Urtarrilaren 1a, Urteberri eguna (osteguna). Hegoalde osoan.
  - Urtarrilaren 6a, Errege eguna (asteartea). Hegoalde osoan.
  - Martxoaren 19a, San Jose guna (osteguna). Hegoalde osoan.
  - Apirilaren 2a, Ostegun Santua (osteguna). Hegoalde osoan.
  - Apirilaren 3a, Ostiral Santua (ostirala). Hegoalde osoan.
  - Apirilaren 6a, Pazko Astelehena (astelehena). Hegoalde osoan.
  - Apirilaren 28a, San Prudentzio (asteartea). Araban.
  - Maiatzaren 1a, Maiatzaren Lehena (ostirala). Hegoalde osoan.
  - Uztailaren 25a, Done Jakue (larunbata). EAEn.
  - Uztailaren 31, Loiolako San Inazio (ostirala). Bizkaian eta Gipuzkoan.
  - Abuztuaren 15a, Ama Birjinaren Jasokundea (larunbata). Hegoalde osoan.
  - Urriaren 12a, Espainiako jaia (astelehena). Hegoalde osoan.
  - Azaroaren 2a, Domu Santuaren hurrengo eguna (astelehena). Nafarroan.
  - Abenduaren 3a, San Frantzisko Xabier (osteguna). Nafarroan.
  - Abenduaren 8a, Sortzez Garbiaren eguna (asteartea). Hegoalde osoan.
  - Abenduaren 25a, Eguberri eguna (ostirala). Hegoalde osoan.

Gehi herri bakoitzeko jai eguna

⇒ Orrialdearen beheko partean egutegi eta kartelerak jaitsi ahal izango dituzue PDF formatuan.

Jai iraingarririk ez

Urtez urte, lan egutegiarekin batera, hainbat jai inposatzen zaizkigu, ezinbestez ospatu beharrekoak eta euskal langileriarentzat iraingarriak direnak. Gainera, Estatuak beste batzuekin ordezkatzeko aukerarik ere ez du ematen. Hala, urriaren 12a edo abenduaren 6a derrigor ospatu beharrekoak dira, bai ala bai.

• Urriaren 12a, gaur egun Espainiako jai nazionaltzat jotzen dena eta aurretiaz Hispanitatearen jaia edo Arrazaren eguna izan zena. Jai honek gure herriaren eta gure eskubideen gainetik hispanitate horren inposaketa suposatzen du. Eta, honetaz gain, Inperio espainiarrak gurutzearen eta ezpataren izenean Latinoamerikako herrietan egindako sarraski guztiak ospatzea ere bai: genozidioa, baliabide ustiaketa, hizkuntza eta kultura akatzea…

• Abenduak 6, Konstituzio eguna. Hegoaldeko herritarroi gure eskubideak ukatzen dizkigun lege-markoa ospatzea adierazten du. Autodeterminazio eskubidea galarazten diguna, hain zuzen ere.

Egun hauek, jakina, ez dira jai ez Bizilanentzat, ez LAB sindikatuarentzat. Eta guretzat ez diren bezala, hainbat enpresetan ere ez. Negoziazio kolektiboaren bitartez posible baita, bultzatu eta lortu izan dugun bezala, jai egun horiek beste batzuekin ordezkatzea.

Lan egutegia enpresan

Lan egutegiaren inguruko arautegia honakoetan aurkituko dugu, besteak beste:

• Langileen Estatutuaren 34.6 artikulua: Bertan egutegia urtero egin beharra eta leku ikusgarrian jarri beharra adierazten da
• 1561/1995 Dekretua, Hirugarren Xedapen Gehigarrian: Langileen ordezkarien parte hartzea lan egutegian
• 5/2000 Dekretuaren 6.1. artikulua eta 40 artikulua: Arau hausteak eta zehapenak
• Hitzarmen kolektiboa. Negoziazio kolektiboaz askotan lan egutegiaren inguruko hainbat puntu adosten dira, sektorean edo enpresan bete beharrekoak direnak.

Lan egutegian honako hau islatu behar da: lan jardunaldia, atseden egunak, jai egunak eta oporraldia. Honetaz gain, jardunaldien banaketa irregularra ere azaldu beharko litzateke, hitzarmenak ezartzen duena errespetaturik.

Enpresak urtero egin behar du lan egutegia. Ze epetan izan behar den, normalean hitzarmen kolektiboak adierazten du. Izan liteke, esaterako, hilabeteko tartea egotea administrazioek jai egunak argitaratzen dituztenetik edo adostu den edozein epe.

Egutegia egin baino lehen, langileen ordezkaritzari kontsultatu behar dio. Honetaz gain, langileen ordezkaritzak aldez aurretiko txostena eman ahal dio enpresari. Txosten hau loteslea ez bada ere, bertan adierazi behar da enpresak urteko jardunaldia, atseden denborak, jai egunak eta zubiak eta abar betetzen ote dituen.

Enpresak lan egutegia ordezkaritzarekin kontsultatu barik egingo balu, egutegia baliogabetzat jo liteke eta zehapena jaso lezake Lan Ikuskaritzaren aldetik. Era berean, txostena loteslea ez bada ere, erabilgarria izango litzaiguke balizko erreklamazioren bat sartu beharko bagenu.

Adostasunarekin edo adostasunik gabe, egutegia langileen bistan egon behar da (normalean informazio paneletan eskegitzen da). Hau lan zentro guztietan egin behar da eta, beharrezkoa balitz, enpresan dauden sail ezberdinetan. Enpresak eta langileen ordezkariek sinatuta egon behar da. Esan bezala, langileen ordezkaritzak kontrolatu behar du egutegian islatzen den horrek legeak eta hitzarmenak ezartzen dutena betetzen ote duen eta errespetatu egiten ote duen. Izan ere, lan baldintzen aldaketa substantziala ekar lezake egutegiak, behin baino gehiagotan gertatzen den bezala.

2026ko jai egunak (lan egutegia)

2026ko jai egunak (lan egutegia)

2026ko jai egunak

Jai iraingarririk ez

Lan egutegia enpresan

2026ko kartelera (PDF formatuan)

Kartelera 1 (pdf)

Kartelera 2 (pdf)

Zerbaiten bila zabiltza? Sartu hona zure zalantza

Ez duzu informaziorik aurkitzen? Proposatu gaia eta guk azalduko dugu