Kontratu mota ohikoenak
Kontratuak bereiztu daitezke iraupenaren arabera (mugagabeak edo aldi baterakoak) edo jardunaldiaren arabera (jardunaldi osoa edo jardunaldi partziala).
Kontratu mugagabea: ez dauka amaiera eperik. Beraz, amaitutzat emateko enpresak justifikatu behar du. Legezko arrazoirik ez badago, kaleratzea bidegabea edo baliogabea izango da. (Ikus. Kaleratze motak)
Aldizkako kontratu mugagabea: kontratu mota hau Langileen Estatutuko 16. artikuluan arauturik dago. Kontratu mota hau mugagabea da, baina langilea aldizka baino ez da aritzen. Hau da, urteko sasoi zehatz batean lan egiten da eta gainontzeko denboran, lan harremanak dirauen arren, etenda geratzen da langilea berriro deitu arte.
Iraupen zehatzeko kontratuak (aldi baterako kontratuak): Langileen Estatutuko 15. artikuluak azaltzen ditu kontratu hauek. Enpresak aparteko langileak kontratatu ahal ditu aldi zehatz baterako, aparteko premiak sortu zaizkiolako. Aparteko premia espezifiko hauek behar den bezala justifikatu behar ditu. Bestela esanda, ezin dira aldi baterako kontratuak erabili enpresaren egiturazko lanpostuak betetzeko.
2022ko lan erreformaren ostean, obra edo zerbitzu zehatz baterako kontratuak desagertu ziren; honela, aldi baterako kontratuak ekoizpenaren gorabeherengatik eta langileen ordezkapenerako baino ezin dira egin:
• Ekoizpen gorabeherengatik: enpresaren jarduera arruntean ekoizpena momentu zehatz batean handitu bada (enpresak eskaera gehiago jaso dituelako, ostalaritzan opor sasoian, merkataritzan Gabonetan…) egin liteke kontratu mota hau. Gehienez sei hilabete iraun lezake, hitzarmen kolektiboan iraupen hau beste sei hilabetez handitu litekeen arren.
• Ordezkapen kontratua: lizentzia, baimen edo bajagatik lanean ez dagoen pertsona ordezkatzeko kontratuak dira. Hortaz, kontratuan ordezkatuko dugun pertsonaren izena eta ordezkapenaren arrazoia azaldu behar dira. Iraupena langilea bere lanpostura itzuli artekoa izango da. 2022ko erreformak ezarri bezala, posible da ordezkapena egingo duen pertsona lanean hastea ordezkatutako langileak enpresa utzi baino lehen. Honela, langile biak batera egongo lirateke, funtzioen garapen egokia bermatzeko, gehienez, 15 egunetan.
Bestetik, langileren batek jardunaldia murriztea erabakitzen badu, posible da ordezkapen kontratua egitea murriztutako jardunaldi zati hori beste langile batek egin dezan.
Azkenik, lanpostu bat kontratu finkoaz bete behar bada eta, honetarako, hautapen edo promozio prozesua egin behar bada, ordezkapen kontratua egin liteke prozesua burutu bitartean.
Alternantziazko prestakuntza kontratua: Prestakuntza kontratu hau Langileen Estatutuko 11.2 artikuluan dator islatuta, baina ondo enteratu nahi baduzu, artikulu oso bat daukazu eskura:
