45 urtetik gorakoentzako subsidioa (langabezia subsidioa)

2021/10/12an eguneratua

45 urte badauzkazu, langabezia prestazioa agortu baduzu eta ez badaukazu familia erantzukizunik, subsidio hau eska zenezake.

Baldintzak edozein langabezia subsidio eskatzeko bete behar diren berberak dira: enplegu eskatzailetzat izena emanda egotea eta zure errentak ez izatea lanbidearteko gutxieneko soldataren %75 baino handiagoak (723,50 euro 2021etik aurrera). Kasu honetan ere langabezia prestazioa agortu duzunetik subsidioa eskatu arte hilabete itxaron behar duzu.

Jasotzen den kopurua IPREMaren %80 da: 451,92 euro (2021erako kopuruak), jardunaldi osoz lan egin baduzu. Jardunaldi partzialaz aritu izanez gero, subsidioa ere partziala izango da (2012ko lan erreformaren ostean).

 

Iraupena:

Sei hilabete. Diru laguntza hau ezin da luzatu.

 

Ze dokumentazio aurkeztu behar da?

– Eskaera dokumentu ofiziala. Bertan 45 urtetik gorakoentzako diru laguntza aukera markatu beharko duzu.
– Nortasun agiria (NAN edo NIE)
– Diru laguntza jasotzeko kontu korrontea egiaztatzen duen bankuaren dokumentua.
– Errenten egiaztagiria (enplegu bulegoan horrela eskatuz gero).

 

Eskatzeko epea:

15 lan egun. Gogoratu kasu honetan langabezia prestazioa agortu ondoren hilabete itxaron behar duzula.