52 urtetik gorakoentzako subsidioa (langabezia subsidioa)

 

2018/03/20
Azken eguneraketa: 2022/06/01

2012ko PPren lan erreformak subsidio hau eskuratzeko irizpideak guztiz gogortu zituen, eskatu ahal izateko adina barne (52 urtetik 55 urtera pasatu zen). Honen ostean, 2019ko Aurrekontu Orokorren Legearen bitartez, berriro aldatu zen. Neurri efektista izan zen hura, erreforma berberak subsidioetan izan zituen beste eragin kaltegarri batzuk bertan diraute eta (hala nola, jardunaldi partzialaz lan egin izanez gero, subsidioa ere partziala izango dela).

Esan barik doa langileentzat horren kaltegarria izan den erreforma hori guztiz eta zeharo utzi behar zela bertan behera; hala zin egin zuen PSOEk, harik eta bere berba jan arte.

 

Bete beharreko baldintzak

Langabezia egoera legalean egon eta enplegu eskatzailetzat izena emanda egotea. Subsidioak irauten duen bitartean langabezia berriztatu beharko duzu dagokizun datetan. Beraz, apuntatu ondo eta ez ahaztu sinatzeaz.

– Langabezia prestazioa edota langabezia subsidioa agortu izana.

Zure diru sarrera gordinak ezin dira lanbidearteko gutxieneko soldataren %75 baino altuagoak izan (750 euro hilean, 2022. urtean).

Subsidio hau eskatzeko, erretirorako besteko kotizazioak izan behar dituzu. Hau da, zure bizi laboral osoan zehar, gutxienez, 15 kotizazio-urte pilatu behar izan dituzu, Gizarte Segurantzaren edozein erregimenetan (orokorra, autonomoak, etxeko lana…). 15 urte hauetatik bi, gutxienez, azken 15 urteetan zehar izan behar dira.

Zure bizi laboral osotik zehar gutxienez sei urte kotizatu behar izan duzu langabeziagatik. Adi! autonomoa edo etxeko langilea izan bazara, izan kontuan erregimen horietan ez dela langabeziagatik kotizatzen.

Alegia, etxeko langilea izan bazara eta 15 urte kotizaturik badauzkazu, baina ez bazara egon sekula erregimen orokorrean, subsidio hau ukatuko zaizu, langabezian kotizatu beharreko sei urteak falta dituzu eta. Begirada bat bota zenezake hurrengo atal hauetan: 45 urtetik gorakoentzako subsidioa, gizarteratzeko errenta aktiboa (RAI), diru sarrrerak bermatzeko errenta (EAE) edo errenta bermatua (Nafarroa).

“Gertaera eragile” edo “hecho causante” delakoaren bidetik ere eskura zenezake. Esan nahi baita, beste subsidioren bat jasotzeko eskubidea badaukazu, hau zuzenean 52 urtetik gorakoentzako subsidio bihur daiteke (hau onuragarriagoa da, zeren eta Gizarte Segurantzan kotizatzen duen subsidio bakarra baita). Legeak berak dioenez, “aldez aurretik beste langabezia-prestazio edo subsidioren bat agortu duten pertsonek jaso ahal izango dute, baldin eta momentu hartatik enplegu zerbitzu publikoetan enplegu eskatzailetzat izena emanda egon badira”.

 

Diru sarrerak

Subsidioa jaso ahal izateko, bete beharreko baldintzen artean, diru sarreren gabezia egiaztatu behar duzu. Zelan neurtzen da hau?

Diru sarrera nahikorik ez daukazula ulertuko da lanbidearteko gutxieneko soldataren %75 baino gehiagorik irabazten ez duzunean.

2022an lanbidearteko gutxieneko soldata 1.000 euro dira. Hortaz, honen %75 750€ lirateke. Honela, hilean ezin duzu irabazi 750€ baino gehiago subsidioa eskatu ahal izateko. Erreparatzen baduzue, kalkulu hauek egiten dituzte 12 ordainsari kontuan hartuta, hau da, aparteko ordainsari biak aparte utzita (normalean, lanbidearteko gutxieneko soldata 14 ordainsaritan hartzen da aintzat: 14.000€ urtean, 1.166,67€ hilean). Baina, badakizue, diru-sarreren muga zenbat eta baxuagoa, orduan eta jende gutxiagok eskatu ahal du.

Balizko errenta hauen artean, honakoak EZ dira kontuan hartuko:

  • Gizarte Segurantzak seme-alabengatik ematen dituen prestazioak (hala ere, bestelako prestazio sozialak bai hartzen dira aintzat).
  • Kaleratzeagatiko kalte-ordaina. Lanetik bota bazaituzte, dagokizun kalte ordaina ez da kontuan hartuko zure errentak zenbatzeko. Berdin da kalte ordain hau dena batera jaso duzun edo zatika eskuratzen ari zaren.

Diru sarrera gordinak hartzen dira kontuan.

 

Zenbat jasotzen da?

Kopuru finkoa da: IPREMaren %80
Hau da, 463,21 euro hilean (2022ko zenbatekoa).

Lehen aipatu dugunez, lan erreformak ezarri zuen jardunaldi partzialaz lan egin izanez gero, subsidioa ere partziala izango zatekeela. Hau 52 urtetik gorakoen subsidioetan derogaturik geratu bazen ere, ez zen hala egin subsidio guztietarako eta ematen diren gehienetan neurriak indarrean dirau. Hala ere, esan bezala, 52 urtetik gorakoen subsidioa beti izango da kopuru berbera: 463,21 euro hilean.

 

Iraupena

Jubilazio adinera arte, beti ere baldintzak betez gero. Hau da, prestazioa eman badizute eta zure egoera aldatzen bada, jasotzeari utziko zenioke.

 

Kotizazioak

Subsidio guztietatik hau da jubilaziorako kotizatzen duen bakarra, SEPEk Gizarte Segurantzan pentsiorako kotizazioak egingo ditu eta.

Kotizazio honen oinarria berriro pasatu zen gutxienekoaren %125 izatera (2012ko erreformak portzentajea %100era jaitsi zuen eta).

 

Eskatzeko epea:

Langabezia prestazioa edo subsidioa kobratzen egon bazara, gogoratu kasu honetan hilabete itxaron behar duzula subsidioa eskatu arte. Hilabete hau pasatuta 15 lan egun dauzkazu eskatzeko.

Lan barik gelditu bazara eta ez badaukazu langabezia prestaziorik edo bestelako subsidiorik eskatzeko eskubiderik, 15 lan egun dauzkazu lan harremana amaitu denetik.

 

Ze dokumentazio aurkeztu behar da?

Eskaera dokumentu ofiziala. Bertan 52 urtetik gorakoentzako diru laguntza aukera markatu beharko duzu.
– Nortasun agiria (NAN edo NIE)
– Diru laguntza jasotzeko kontu korrontea egiaztatzen duen bankuaren dokumentua.


⇒ Subsidioa behar duzun denbora osoan jaso ahal izateko, gogoratu langabezia sinatu behar duzula dagokizun egunetan. Honetaz gain, urte bakoitzean aurreko urtean jaso dituzun errentak egiaztatzen dituen dokumentua aurkeztu beharko duzu.